Sir 4

1 Чадо, живота нищаго не лиши и не отвращай очес от просящаго, 2 души алчущия не оскорби и не разгневай мужа в нищете его, 3 сердца раздраженаго не превозмути и не продолжай даяния требующему, 4 раба скорбяща не отрей и не отврати лица твоего от нищаго, 5 от требующаго не отврати очес и не даждь места человеку кляти тя: 6 кленущаго бо тя в горести души своея мольбу услышит Сотворивый его. 7 Приятна соборищу твори себе и князю смиряй главу твою, 8 приклони ухо твое к нищему и отвещай ему мирная в кротости, 9 изми обидимаго из руки обидящаго и не малодушествуй, егда судиши, 10 буди сирым яко отец и вместо мужа матери их: 11 и будеши яко сын Вышняго, и возлюбит тя паче неже мати твоя. 12 Премудрость сыны своя вознесе и заступает ищущих ея: 13 любяй ю любит жизнь, и утренюющии к ней исполнятся веселия: 14 держайся ея наследит славу, и идеже входит, благословит его Господь: 15 служащии ей послужат Святому, и любящих ю любит Господь: 16 слушаяй ея судити имать языки, и внимаяй ей вселится надеявся. 17 Аще уверуеши, наследиши ю, и во одержании будут роды его: 18 яко стропотно ходит с ним в первых, боязнь же и страх наведет нань 19 и помучит его в наказании своем, дондеже веру имет души его и искусит его во оправданиих своих, 20 и паки возвратится прямо к нему и возвеселит его 21 и открыет ему тайны своя: 22 аще заблудит, оставит его и предаст его в руце падения его. 23 Блюди время и хранися от лукаваго, 24 и о души твоей не постыдися: 25 есть бо стыд наводяй грех, и есть стыд слава и благодать. 26 Не приими лица на душу твою и не срамляйся о падении твоем. 27 Не возбрани словесе во время спасения: 28 в словеси бо познана будет премудрость, и наказание в глаголех языка. 29 Не пререкай противу истины и о ненаказании твоем срамляйся: 30 не стыдися исповедати грехи твоя и не воспящай быстрины речныя. 31 И не подстелися мужу бую и не обинися лица сильнаго. 32 Даже до смерти подвизайся о истине, и Господь Бог поборет по тебе. 33 Не буди скор языком твоим, ленив же и слаб в делех твоих. 34 Не буди яко лев в дому твоем и жестоконеистов в рабех твоих. 35 Не буди рука твоя простерта на взятие, а на отдаяние согбена.